《流沙爆餡記》 西環不嬲都好多有質素嘅美食，等萬眾期待嘅西營盤站再開埋，潮友得閒帶埋朋友嚟呢邊發掘吓啦！
好似呢間新茶樓，有兩層，規模細細，食物、服務、環境都幾好，而且點心碟碟明碼實價，全部都$15-$20不等，茶位$5仲免加一！點解值得一試？因為呢度有PND最鐘意嘅「流沙奶皇包」！呢度一張點心紙幾十樣點心，特別在佢地嘅流沙奶黃包$18/3個，用咗新鮮蛋黃每日製造，即叫即蒸熱辣辣上枱，一搣開奶皇包，不得了！裡面嘅橙黃色「溶岩」好有蛋香，比較流質，慢慢地流哂出嚟。咁食落又點呢？測試證明流沙包身夠軟熟鬆化，係可以一試嘅！
陳皮蜂蜜燉雪梨$15一盅，雪梨已經燉到好軟綿綿、淋身入哂味，熱辣辣好香陳皮味，加埋蜂蜜入口係幾潤喉，比糖水舖嘅木瓜雪耳更有誠意。
滋味蜂巢糕$17/1籠4件，蜂巢糕質感厚實，食落鬆化彈牙，有啲似厚實版嘅馬拉糕，暗甜香軟，食到有少少黑糖味道，而且糕身有好多細細嘅蜂巢，好得意
星期一至日 07:00-20:00
#PND西環 #PND中式 #PND港式 #PND小食
@西環德輔道西239號德美樓地舖
Search